Lente!

Maart is hier en ek weet sommer die Lente het uiteindelik opgedaag. Vroeër die week het die voëls al anders begin klink en verder het ons grasperk ook sommer drasties oornag begin groei. Alles goeie nuus vir iemand wat nie meer kan wag om te begin saad saai nie. Hopelik sal die naweke ook nou warmer wees – ons verwag een van die dae 11 grade – en dan kan ek begin om my grond ook voor te berei. Ons spaar nou al ‘n paar weke lank al ons eierdoppe en ek is seker die plantjies gaan die ekstra kalsium geniet. Verder het ek ook ‘n boks vol been, bloed en vis – klink aaklig, maar goed vir groente – wat ek in my grond in wil werk en laat rus voor ek later my plantjies uitplant.

Maar wat praat ek van plantjies uitplant, hulle is nog maar net saaidjies wat nog moet groei voor ek kan droom van uitplant. Dit is nou wel nog te koud om my spanspek saad uit te toets, maar die tamatie, beet, komkommer en murgpampoentjies is al gesaai in hul klein potjies en staan onder ‘n warm radiator.
Ek kloek behoorlik oor hulle en spuit gedurig met ‘n water spuitjie om te verseker die grond bly klam, droog nie uit nie, maar raak ook nie te nat nie. As ek gelukkig is behoort ek een of ander tyd ‘n paar groen koppies te sien. En deur so vroeg te begin het ek darm tyd vir weer probeer as hierdie spul nie uit werk nie. Party mense glo daarin om ‘n oormaat te saai en dan net die heel beste uit te plant en die res weg te gooi, maar ek kan dit nooit oor my hart kry om ‘n plantjie weg te gooi nie, so ek sit maar al my hoop op die paar saaidjies wat ek geplant het. Daarom beplan ek op 2 murgpampoentjie plante, 2 tamatie plante, 2 komkommer plante en soveel beet as wat ek kan in pas. Sover het ek 8 beet saadjies gesaai en behoort 16 plantjies te kry uit die lot – beet gee altyd meer terug as wat jy insit – te verstane dat dit een van my gunsteling groentes is. Goggas eet dit ook nie en verder weerstaan hulle byna alles en is lank nog aan die groei na alles gevrek het. Ah beet!

Vandag het my Thompson & Morgan saad ook opgedaag – dis nou my sonneblomme, chives en so. Daar is geen haas nie, want hulle sal ek sommer buite in die grond plant sodra die weer behoorlik opgewarm het. So ook vir die mange tout – hulle plant ek sommer direk in die grond, want hulle groei so maklik en vinnig.

Ek en Juan sal ook ons ‘Arch’ moet gaan installeer om te kyk of hy gaan werk vir ons mange tout, komkommers en spanspek. Tien teen een gaan ons nog ‘n arch moet gaan koop. Sit sommer ‘n groot glimlag op my gesig as ek dink aan alles wat nog kom. Is dit nie wonderlik wat die aarde jou alles kan bied nie, met net ‘n bietjie werk en hulp van jou kant af.