Die lieflike dames by my werk gooi gereeld goeie kos weg. Hulle koop eetgoed aan die begin van die week, los dit in hulle laai en hier by Donderdag of Vrydag besef hulle dat hulle nooit al daai appels, tamaties of naartjies betyds gaan eet nie. Die tweede keer toe ek iemand 'n dood goeie naartjie so opsy sien sit het vir die asblik, vra ek toe of ek dit maar kan neem vir my versapper - ja, ek weet ek klink soos 'n aasvoel, maar ek hou nie van kos mors nie. Nadese word elke liewe ou vrug eers vir my aangebied voor dit weggegooi word. Nou voel ek al so sleg oor al die verniet kos, dat toe ek eergister weer 'n sak appels aangebied word, besluit het om so ietsie terug te gee.
Appel Piesang Brood
150 g suiker (ek gebruik bruin)
85 g sagte botter
2 eiers
2 sagte piesangs
2 gerasperde appels (1 sal genoeg wees, maar ek het twee gehad)
250 g bruismeel en 'n hand vol oats
Kaneel & 'n Knippie Sout
Verroom die suiker en botter. Klop die eiers in en meng dan die vrugte by. Sit dan die meel, kaneel en sout by en meng. Gooi dan sommer 'n hand vol oats by, net om jou te verbeel dit is gesond. Sit in 'n gesmeerde broodpannetjie, strooi so 'n rytjie oats en suiker bo-oor en bak teen 180grade vir 40-50 minute. Myne was dalk nog langer in - toets hom maar met 'n stokkie tot dit skoon uitkom. Haal hom uit sy pannetjie en laat hom afkoel op 'n rakkie vir so 'n uur en eet net so.
No comments:
Post a Comment