Nuut uit oud

Vandag het ek 'n baie produktiewe middagete gehad en nou is ek super in my noppies. Hier teen elfuur maak ek 'n koppie tee by die werk en merk op dat iemand 'n lee hot chocolate blik wil weg gooi. Ek bekyk daai blik so en dink, nee wat, met jou gaan ek 'n plan maak.

Een uur stap ek toe vinnig huis toe met die blik ewe in my handsak. Ek hoop nie iemand by die werk het dalk gedink daai blik is nog vol nie. Eers het ek gedink ek kan dit met mooi papier oortrek of iets, maar toe onthou ek dat ons 'n blikkie swarbord verf in die kas het. Ek laat toe nie op my wag nie en gee die blik 'n laag verf. Toe ek sien hy lyk of hy kan doen met twee lae, gaan plant ek sommer gou 'n paar bolle in die voortuin, eet my middag ete en pak 'n paar dinge reg. Toe gee ek hom gou 'n tweede laag verf en gee my arme ou 'Money Trees' 'n nuwe tuiste. Ek dink nie plante wat baie water kort sal werk nie, maar die ou goedjies sal seker ok wees - ons sal maar moet sien.

Die plantjies het ek seker so twee jaar terug by 'n vrou geskenk gekry toe ek haar tafel by haar gekoop het. Mens sien hulle in elke Chinese Take-away en hulle is veronderstel om vir jou rykdom te bring. Vreemd dat hulle so 'n Chinese aanhang het, want blykbaar is hulle eintlik van Suid-Afrika. Ek was nogal bekommerd oor ons rykdom, want Juan het net so voor Valentynsdag die een plantjie amper in sy peetjie geskop en na dese le hy toe heeltyd in die skoppie, saam met sy hope grond, wagende vir 'n nuwe huisie.

En alhoewel ekstra geld sweerlik nie te versmaai is nie, is die rykdom in ons ou huisie beslis liefde...

Nog veels te koud, so ons droom maar aan

Hier het die weer beslis 'n draai vir die erge geneem. Dit was die afgelope week so koud dat die fonteine in Trafalgar Square blykbaar gevries het. Daar val heeltyd flurries sneeu en my tone voel permanent soos ysblokkies. Die weerburoe voorspel die koue gaan nog 'n rukkie duur, so ek sal maar geduldig moet wag vir beter dae voor ek my dingetjies kan begin plant.

So met die geskenk van die wonderlike potte by die ashoop, het ek nou begin dink aan blomme..en kruie... My fokus is gewoonlik groente, maar laas jaar het ek darm twee pragtige sonneblomme gegroei asook 'n oorvloed van kappertjies en soet geurige sweet peas.

Een vrou se gemors...

..is 'n ander vrou se Appel Piesang Brood.

Die lieflike dames by my werk gooi gereeld goeie kos weg. Hulle koop eetgoed aan die begin van die week, los dit in hulle laai en hier by Donderdag of Vrydag besef hulle dat hulle nooit al daai appels, tamaties of naartjies betyds gaan eet nie. Die tweede keer toe ek iemand 'n dood goeie naartjie so opsy sien sit het vir die asblik, vra ek toe of ek dit maar kan neem vir my versapper - ja, ek weet ek klink soos 'n aasvoel, maar ek hou nie van kos mors nie. Nadese word elke liewe ou vrug eers vir my aangebied voor dit weggegooi word. Nou voel ek al so sleg oor al die verniet kos, dat toe ek eergister weer 'n sak appels aangebied word, besluit het om so ietsie terug te gee.

Hierdie is sommer so 'n half opgemaakte resep en die koekbrood is 'n bietjie dig, maar steeds lekker en dit voel darm nie vreeslik ongesond nie. Mens kan dit beslis ook maak met aansienlik minder suiker...

Appel Piesang Brood

Maak hooi terwyl die son skyn

...en as ons nou nie kan hooi of tuin maak nie, moet ons maar 'n uitstappie maak. Ons was rerig gelukkig met lekker sonnige weer vir ons uitstappie na Eastbourne en die Seven Sisters roete die naweek. Nou nie seker wat die temperatuur was nie, maar die son het beslis geskyn, en ons het ons voete ordentlik deurgestap op Eastbourne se strand.

My ouers se kind

Vandag was 'n goeie voorbeeld van hoe ek 'n goeie mengsel van beide my ouers is. Dis nog gans te koud hier om saadjies te begin ontkiem, selfs binne, maar as die weer dit enigsins toelaat, is dit 'n goeie idee om maar stadig maar seker die tuin reg te kry vir die Lente wat kom.

Terug van die winkels af vanoggend, pak die gier my om gou die voorste tuin reg te ruk, dooie bosse te snoei en onkruid uit te trek. En ek pak dit natuurlik met groot ywer toe en doen dit ordentlik - nes my Ma. Klaar gewerk, sit ek met 'n groot sak goeters wat nou uit gegooi moet word. Dit is my Mams uit en uit - werk hard en maak seker jy doen dit reg en jy doen dit klaar, los nie half oor vir later. So oortuig ek vir Juan dat ons nou na ons 'recycle centre' moet gaan, eerder as wat die sak goed nou weer hier rondstaan en natreen en dan is alles klaar en reg.

Waar het dit alles begin?

Die hele punt van Epsom toe trek was sodat ons 'n plek met 'n tuin kon bekostig. Ons wou eintlik maar net braai en 'n bietjie son vang. Toe ons hier ingetrek het, het hier beslis nie veel aangegaan nie. Nou is daar 'n dammetjie (wat die bure se katte fassineer) en plante en kleur!

Dinge om na uit te sien

Hierdie jaar het ons groot planne vir die klein tuintjie van ons. Ons huur, so ons kan nou nie gaan staan en die plek opgrawe nie, en ons het nie veel spasie om dinge in te groei nie, maar ons gaan sien wat ons kan uitrig. Die planne vir 2013 sluit in: