En so staan ons jaar vinnig einde se kant toe en is die feesseisoen op hande. Ons boom is opgeslaan, ons klein geskenkies is toegedraai en ons kos is beplan vir more...maar skielik lyk die boom vir my 'n bietjie kaal en wonder ek of ek van iets vergeet het. Natuurlik, my jaarlikste kerskoekies!
As kind het my Tannie se boom altyd tuisgebakte koekies opgehad en dit was vir my meer magical as al die liggies en geskenke saam. Ek maak dus 'n punt daarvan om self ook koekies te maak elke jaar. Ek het 'n resep wat ek aanlyn gevind het bietjie aangepas en is heel tevrede met die resultate.
Kerskoekie Resep
- 100g sagte botter
- 100g strooisuiker (ek gebruik sommer bruin)
- 1 geklopte eier
- 275g gesifte meel
- 1 teelepel vanieljegeursel
- Gemengde speserye (kaneel, naeltjie ens.)
Om te versier:
- 50g versiersuiker
- 1 - 3 teelepels water
- kleursel
Voorverhit die oond tot 190 grade en voer 'n bakplaat met bakpapier uit.
Verroom die botter en suiker saam tot sag. Voeg die vanielje en 'n paar skote gemengde speserye by die eier en klits dit dan stadig by die botter mengsel tot goed gemeng.
Roer die gesifte meel dan in totdat die mengsel saam kom tot 'n deeg.
Rol die deeg uit op 'n meelbestrooide werksoppervlak tot 'n dikte van nie meer as 1cm. Gebruik dan jou gunsteling koekiedrukkers of 'n glasie om die koekies uit te druk. Hou maar die meel byderhande om te help dat alles nie aan alles anders vassit nie.
As jy van plan is om hulle aan die boom te hang, onthou om 'n gaaitjie te maak om 'n lussie aan te ryg.
Bak die koekies vir 8-10 minute tot bleek goudbruin. Los dit op die bakplaat vir 5 minute om hard te raak en haal dan versigtig af en laat afkoel op 'n draadrak.
Vir die versiersel, sif die versiersuiker in 'n mengbak en roer stadig maar seker genoeg water in om 'n gladde mengsel te skep. Voeg dan versigtig 'n druppel of twee voedselkleursel by tot jy die regte kleur bereik het.
Versier jou koekies soos jy goed dink. Ek is nie besonders goed met hierdie sy van dinge nie, maar ek dink soms hoe leliker hulle is, hoe meer tuisgemaak lyk hulle.
Jy kan versiersuiker bo-oor sif of glitter of gekleurde of silwer balletjies gebruik om dit verder mooi te maak. Los eenkant om hard te raak, ryg dan garing deur en hang aan jou boom.
Pragtig op die boom en lekker om te eet saam met 'n lekker koppie tee - wat meer wil jy nou hê? Salig!
Ons wens julle almal 'n vreeslike Geseënde Feesseisoen toe en net alles wat mooi is vir die Nuwe Jaar wat voorlê. Ek het sommer 'n baie goeie gevoel oor 2014...
No comments:
Post a Comment